Panganay na anak ng meyor ng Bansud na si RJ MORADA at Chief Security nitong si NESTOR RIVAMONTE, 20 milyong piso ang hininging ransom sa biktimang si ARMANDO GALANG kapalit ng kanyang kalayaan
Picture
Ricardo Barcelo Morada IV a.k.a RJ. Morada
Picture
Nestor R. Rivamonte a.k.a. Baleleng
Ni Jasmine Santiago
Reporter
, online version
 
LAS PIÑAS CITY, Abril 19, 2013 – Inirekomenda ng National Bureau of Investigation (NBI) ang mabilis na prosekusyon sa panganay na anak ni Meyor Ronaldo Morada na si Ricardo Barcelo Morada IV, a.k.a. RJ; Nestor Rivamonte, Chief Security Officer ni Meyor Morada at tatlo pang John Doe kaugnay sa kidnapping kay Armando B. Galang at Michael H.Dutcher. Naganap ang kidnapping noong Enero 6, 2012 sa Las Piñas City.


Sa ipinadalang sulat ni Atty. Efren L. Meneses, Jr., NBI Regional Director, National Capital Region (NCR) kay Hon. Marlyn Cynthia Fatima Madamba Luang, City Prosecutor, Las Piñas City, noong Abril 10, 2013, kasong kidnapping at mabilis na prosekusyon ang opisyal na rekomendasyon ni Meneses laban sa mga kidnapper batay sa resulta ng masusing imbestigasyon ni Special Investigator III Gary P. Ruiz, NBI-NCR.

MGA KIDNAPPER

Tinukoy sa imbestigasyon ang mga sumusunod na limang kriminal na kidnapper: (1) Nestor Red Rivamonte, Chief Security ni mayor Morada at kasalukuyang nakakulong sa New Bilibid Prison, Muntinlupa City batay sa sentensiya kaugnay sa iligal na droga (shabu); (2) Ricardo Barcelo Morada IV a.k.a. RJ Morada, panganay na anak ni mayor Morada, nakatira sa Poblacion, Bansud, Silangang Mindoro; (3) John Doe No. 1, 40 taong-gulang, may taas na 5’6” – 5’7”, may nunal sa kaliwang bahagi ng mukha; (4) John Doe No. 2, may edad na 40-50 taong gulang at may taas na 5’6” – 5’7”; at (5) John Doe No. 3, ang mastermind, taga-bigay ng utos kay Rivamonte.

Ang kasong kidnapping na isinampa sa Las Piñas City Prosecutors Office ay may bilang na NPS Docket No. XV-04-INV 13D-00468.

Picture
Unang pahina ng 7 pahinang sulat ni Atty. Efren L. Meneses, Jr., NBI Regional Director, National Capital Region (NCR) kay Hon. Marlyn Cynthia Fatima Madamba Luang, City Prosecutor, Las Piñas City
MGA BIKTIMA NG KIDNAPPING

Ang biktimang si Armando B. Galang, 64 taong-gulang, may-ari ng El Kapitan Pro Sounds and Lights System Inc., na matatagpuan ang opisina sa Naga Road, Pulanglupa 2, Las Piñas City, isang Bansudeño. Kabilang din sa biktima si Michael Dutcher, 36 taong-gulang, supervisor ng El Kapitan Pro Sounds and Lights System Inc.

Si Galang ang nagbibigay ng de-kalidad na Sounds and Lights System sa pamamagitan ng kanyang kumpanya tuwing piyesta sa bayan ng Bansud simula pa noong maging mayor si Morada noong 2007 hanggang 2012.
 
IMBESTIGASYON NG NBI

Batay sa imbestigasyon ng NBI, sina Nestor Red Rivamonte, Chief Security ni mayor Morada, Ricardo Barcelo Morada IV a.k.a. RJ Morada, John Doe No. 1, John Doe No. 2, at John Doe No. 3 ay nagkasundo, nagsabwatan at nagsama-sama sa pag-kidnap sa mga biktimang sina Armando B. Galang at Michael H. Ducther.

Mula sa sa labas ng El Kapitan Pro Sounds and Lights System Inc. sa Las Piñas City, noong Enero 6, 2012, kinidnap at isinakay ang mga biktima sa isang kulay berdeng tinted van na Toyota Hiace, may palakang No. ZHZ-516, na minamaneho ni Rivamonte, katabi si Morada sa front passenger seat.

Ayon pa sa report ng imbestigador ng NBI, dinala ng mga kidnapper sina Rivamonte, Morada at mga kasamahan ang mga biktima sa C-5 Extention Road, Las Piñas City. Sa hindi mataong lugar, biglang itinigil ni Rivamonte ang van. Binunot ni Rivamonte ang dalang pistolang may nakakabit na silencer, ikinasa at itinutok kay Galang. Agad na iniutos ni Rivamonte kay John Doe No. 1,”pare, yung posas. Posasan mo!” Habang pinoposasan ni John Doe 1 si Galang, pasigaw na sinabi nitong, ”huwag lalaban, pera-pera lang kailangan namin at para huwag masaktan.” Kasabay nito’y bumunot din ng pistola si Morada at mabilis namang itinutok kay Dutcher.

Sinabi din sa report ng NBI, pagkatapos maposasan si Galang, kinuryente naman ni John Doe No. 2, na noon ay nakaupo sa likuran ng dalawang biktima, ang batok ni Dutcher gamit ang stun gun. Takot na takot si Ducther at paulit-ulit na sinasabi nitong, ”Diyos ko  po, huwag po, Diyos ko po, huwag po!” habang nakayuko sa kanyang hita at hawak ng dalawang kamay nito ang kanyang batok na kinuryente.
   
Mabilis na kinuha naman ni John Doe No. 1 ang belt bag, lisensiyadong pistol, wallet at cellphone ni Galang.

Kasabay nito’y nagtatakang tinanong ni Galang si Rivamonte,”bakit ginagawa mo ito sa akin, Nestor? Bakit ginaganito mo ako?”  Ang naisagot lamang ni Rivamonte ay, ”Sir, subong-subo na ako”, pagkatapos ay inihampas ni Rivamonte ang kanyang kamay sa manibela ng sasakyan.

Sa paulit-ulit na tanong ni Galang, naisagot ni Rivamonte na, ”pag hindi ko ginawa ito, sa Mindoro ang pamilya ko, baka patayain ang pamilya ko.”

Nagbanta din si Rivamonte kay Dutcher, ”tandaan mo Mike, alam ko ang bahay mo, alam ko kung saan ka nakatira.”
 

RANSOM NA P20 MILYON, KAPALIT NG KALAYAAN
   

Nag-demand si Rivamonte ng halagang dalawampung milyong piso (P20 milyon) kay Galang kapalit ng kalaaan nito. ”Sir, pera-pera lang para pakawalan ka namin nang hindi masasaktan”. “Kahit tadtarin mo ako ng pinong-pino, Nestor, wala akong maibibigay sa inyo na twenty million”, sagot ni Galang kay Rivamonte. Ang hinihinging P20 milyon ay bumaba sa halagang P10 milyon.”Wala ako kahit isang milyon,“ sagot ni Galang,“ na hindi naman pinaniwalaan ni Rivamonte.

Alam ni Galang na hindi titigil ang mga kidnapper, kaya’t nag-counter-offer si Galang ng Metrobank blank check No. 0421045169, na nasa kanyang wallet na kinumpiska ng mga kidnapper. May balanse ang kanyang account sa banko sa halagang P600,000.00 (photocopy ng tseke sa ibaba).

Picture
Metrobank check No. 0421045169, may petsang Enero 6, 2012, sa halagang P600,000.00
Picture
Likod ng check No. 0421045169, makikita ang pirma ni Nestor Rivamonte sa loob ng bilog na pulang guhit.
Pagkatapos makausap ni Rivamonte sa cellphone si John Doe No.3, na sa paniniwala ni Galang na iyon ang mastermind, pumayag si Rivamonte sa halagang iyon. Agad silang nagtungo sa Metrobank, Pamplona Branch sa Las Piñas City. Pagkatapos mapirmahan ni Galang ang tseke, sinabi ni John Doe No.1 kay Rivamonte, ”sige pare, pag hindi ka nakabalik, tutuluyan na namin ang dalawang ito.”

Nakabalik si Rivamonte sa sasakyan mula sa loob ng banko at hawak na nito halagang P600,000.00 ransom, na nakalagay sa isang brown paper bag.
Picture
DAGDAG NA RANSOM: LIBRENG SERBISYO NG ”EL KAPITAN” SA PIYESTA
   
Nakuha na ni Rivamonte ang ransom sa halagang P600,000.00, subalit hindi pa din pinapakawalan ang mga biktima. Pagkatapos ng halos labing-limang minuto na pakikipag-usap ni Rivamonte kay John Doe No.3, may panibagong demand si Rivamone kay Galang.

Iginiit ni Rivamone kay Galang na obligadong dalhin nito ang mga pasilidad ng kanyang El Kapitan Pro Sounds and Lights System Inc. nang libre, sa piyesta ng Bansud, Silangang Mindoro, na nakatakdang ganapin noong Enero 17-19, 2012.
Ang buong set-up ng ”El Kapitan” para sa ganitong okasyon ay kabilang ang mga equipments para sa audio, lighting at staging facilities. Kabilang din ang dalawampung (20) abereyds na bilang ng personnel at crew na mananatili sa Bansud sa loob ng limang araw. Karaniwang gastos sa kanitong event ay umaabot sa halagang P900,000.00.

Nagbanta pa si Rivamonte kay Galang. ”Kapag hindi mo dinala sa piyesta ang El Kapitan, masama ang mangyayari sa’yong pamilya at sa’yong negosyo.“ Ipinagmalaki pa ni Rivamonte na marami na silang pinatay, at sinabi pa niyang, ”madali lang naming gawin iyon sa’yong pamilya at sa negosyo mo.”  Napilitang sumang-ayon si Galang sa kagustuhan ng mga kidnapper.

Matapos nito’y pinakawalan na ng mga kidnapper ang mga biktimang sina Galang at Dutcher.

MGA NAUNANG TULONG NI GALANG SA MGA MORADA AT KAY RIVAMONTE 

Pulit-ulit ang katanungan ni Galang sa mga kidnapper, habang paikut-ikot ang sinasakyang van, ”bakit ginagawa niyo ito sa’kin?” Pinaalala ni Galang kay Rivamonte na sa bawat pagkakataon na lumapit ang huli, tuwing magkaroon ng problema sa pinansiya si Rivamonte ay mabilis na tumutulong si Galang at kanyang asawa, kahit hating gabi.

Paulit-ulit ding sinabi ni Galang kay Morada, ”patuloy akong  nagbigay ng suporta at financial assistance sa iyong buong pamilya at sa’yong ama”. Si Galang din ang gumastos sa wedding reception nung ikasal si RJ Morada. Sinuportahan din ni Galang ang pangangailangang pinansiyal ng ama ni RJ Morada na si Ronaldo Morada sa kanyang pagpasok sa pulitika simula 2007 hanggang 2010.     

MOTIBO NG KIDNAPPING


Batay sa imbestigasyon at dokumentong hawak ng NBI na isinampa sa korte, lumilitaw ang tatlong motibo ng mga kriminal na kidnapper: una, likhain ang lagim at takot kay Galang para hindi na niya muling marekober ang mga kinamkam na mga lupain nito sa Bansud. Namanipula at nailipat sa ibang pangalan ang anim (6) na titulo ng mga lupain ni Galang sa Bansud nang di-otorisado at wala siyang pahintulot. May kabuuang 33 ektarya ang naturang mga ari-arian ni Galang ang kinamkam ng mga kriminal. Ikalawa, para patuloy nilang makuha ang libreng serbisyo ng ”El Kapitan” sa piyesta ng Bansud, at ikatlo, ay kumita ng pera sa masama at marahas na paraan.

SINO SI JOHN DOE NO.3?                                   

Batay kay Galang, si John Doe No. 3 ang mastermind. Galing sa taong ito ang lahat ng mga instrukyon kay Rivamonte. Sabi ni Galang, mahilig ito sa magarbong piyesta sa Bansud.®



 


Comments




Leave a Reply


local politics, good governance, transparency, accountability, people's participation, political reform, reform politics, bansud, oriental mindoro